南韓嘅車模為迎合商品嘅主題，表現出優雅嘅一面，亦因為咁嘅緣故，予人千篇一律嘅感覺。不過私底下嘅佢哋又係點嘅呢？好似人氣車模殷善英咁，喺鏡頭前嘅佢總係冷艷無比，原來現實生活中佢係個熱情奔放嘅女生。
出生於南韓京畿道安山市嘅殷善英，喺車模界揚名之前，其實已經兼職模特兒工作，主要為商品同時裝拍攝平面廣告。以佢甜美嘅樣貌同埋前凸後趷嘅身材，加上較南韓一般都主打偏纖瘦身形嘅模特兒嚟講，佢嘅身形偏向有肉感，如此出眾嘅天賦本錢，點解唔一開始就以模特兒為正職呢？原來當時佢一心向電視台幕後工作發展，亦因為咁嘅緣故，模特兒並非佢嘅優先考慮。不過金子總會發光，以佢如此優厚嘅外在條件，又點會唔被人賞識呢？
喺2014年初，佢獲模特兒經理人公司垂青，同時力邀佢參加超級賽車模特兒大賽。經過一番思量後，決定挑戰一下，結果獲得最佳姿態獎。縱然未能奪冠，但係佢迷人嘅樣貌已經令唔少人留下深刻印象，同時佢身上所散發出冷艷又文靜嘅氣質，更係話畀大家知，其實佢亦可以成為一位專業車模。因此喺比賽後，佢成為一位專業車模，同年又化身性感賽車女郎，喺賽道上展現迷人風姿。須知道南韓賽車比賽中，有唔少同樣美艷無比嘅賽車女郎。不過佢憑住誘人外表，以及略帶肉感嘅身材，不但帶畀大家新鮮感，仲成為鏡頭捕捉嘅焦點，而從呢一刻開始，佢嘅名字紅遍整個南韓車模界，甚至成為車隊嘅專屬車模。呢個成績對於一位新進車模嚟講，絕對非常亮眼！
鏡頭前嘅佢，總予人一種冷艷感覺，不過現實生活中嘅佢，卻同工作時有極大嘅差別。大家咪以為平時嘅佢，只係識得美容同購物，雖然呢個亦係佢生活嘅一部分，而佢亦樂於話畀大家知，當佢購物起嚟時有幾咁瘋狂，但呢個並非佢生活嘅全部，平時佢鍾意游水、潛水同滑水。點解都係同水有關嘅？原來鍾意游水嘅佢，細個時曾經諗過成為一位游泳選手，只係後嚟擔心因為鍛煉游水會令身形變得好大隻，所以打消咗呢個念頭。不過佢至今仍熱愛同水有關嘅運動。另外，佢並唔似得外形咁冰冷，平日最愛約埋一班朋友去玩、唱K。為咗令到玩樂氣氛更加濃厚，佢同朋友每次都會為聚會定下一個主題，好似早前嘅萬聖節，包括佢在內嘅一班朋友，個個都化身成性感嘩鬼示人，玩得夠晒投入。點解佢咁鍾意成班朋友一齊玩呢？佢就話朋友係一種互相扶持嘅關係，尤其當你覺得有啲事唔係咁適合同屋企人分享時，朋友就係最佳傾訴對象。為咗可以保持朋友間嘅關係歷久常新，佢唔介意花啲心機喺朋友身上。不過佢又慨嘆，隨住大家嘅工作愈嚟愈忙碌，聚會嘅機會變得愈嚟愈少，因此令佢更加珍惜每次相聚時刻。
簡介： 外表冷艷嘅殷善英，其實內心亦有熱情嘅一面。如果大家肯花多啲時間Click入佢嘅IG，仲會發現呢位外冷內熱嘅迷人車模，原來有更多不為人知嘅一面。
網址： https://www.instagram.com/lsy90eun/
出生地：京畿道安山市
身高：174cm
三圍：36、24、36
撰文：魂