政情：檢討前夕 教界嗌撤TSA 吳得掂又捱打

葉建源尋日發表《教育政策前瞻》，就明年初公布嘅施政報告同財政預算案提出多項教育政策建議，當中更重提TSA。佢話下星期一嘅立法會教育事務委員會，將會討論TSA檢討嘅最新進展，而TSA檢討委員會亦預計喺幾日內開會，就出年會唔會重新實施TSA提交建議，所以先猜測TSA將會又再炒熱。

鬧政府孤寒 投放資源不足

佢希望政府同檢討委員會都明白，社會關注到TSA會扭曲課程，以及造成過度操練情況，所以呼籲政府大刀闊斧咁取消TSA，更重申呢個係重要期望添！呢個要求可能會考起吳得掂，但其實葉建源都話繼續暫停全面恢復都可以接受，唔知吳得掂最後點應對呢？

除咗TSA，葉建源仲建議增加班師比例同改善教師編制，又批評政府係愧對教師隊伍，而呢個需求佢更爭取多年都未成功。佢話教師嘅工作量過去十年不斷膨脹，搞到教師連關懷學生嘅時間都少之又少，擔心會導致未能預防學生出現問題。

佢又批評呢四年嘅教育政策混亂，亦積累咗唔少問題，但只要政府願意投放資源就可以解決，無奈政府過於孤寒，投放於教育嘅資源一直偏低，教育開支比例亦不斷下跌，先搞到問題一籮籮；難怪佢要發表教育政策建議，並喺聽日約見政府官員。

施政報告預算案忽視教育

講番施政報告同預算案，葉建源就話現屆政府喺過去四年都冇將教育施政作為優先項目，發表咗四份都得唔到教育界支持，佢本人更係連續四年投下反對票添！佢認為明年初公布嘅施政報告同預算案，係現屆政府嘅最後機會去展示係咪重視同關心教育。睇嚟唔單止吳得掂，連成個政府都要捱打。