中環出更：示威者怒打「囚徒」漢奸黎
聲討壹傳媒黎智英（漢奸黎）嘅行動未有因禁制令頒下而稍息，尋日再有一批示威者踩上漢奸黎寓所門外抗議，轟漢奸黎操控選舉、賣國求榮，更拳打穿上囚衣、雙手反鎖鐵鏈同貼上漢奸黎卡通頭像嘅公仔。
十九名聲稱自發人士尋日上午約十時四十分喺漢奸黎位於何文田嘅寓所外示威。佢哋帶有寫上「漢奸黑金主 操控選舉假民主」嘅橫額，舉起寫上「忘祖忘宗 真漢奸」、「賣國求榮 叛國求利」、「剷除毒傳媒」等標語，並用大聲公大叫口號，又拳打一個穿上囚衣，雙手反鎖鐵鏈加一邊貼上漢奸黎卡通頭像、另一邊戴上骷髏頭面具嘅公仔發洩，佢哋逗留至中午十二時左右離開。而喺示威期間，警員到場了解，保安更向示威者派發法庭發出嘅告示，指漢奸黎已向高院申請禁制令。
不過，示威者喺下午二時四十五分左右折返，大叫口號，其後有律師向示威人士派發法庭文件，有示威者指自己唔識英文，律師就要求佢哋自行向所屬律師了解。示威者逗留至下午約四時十分和平散去。
法庭周五處理禁制令申請
另外，漢奸黎前日入稟高院頒發禁制令，按司法機構網頁顯示，該案將於本周五喺高院進行聆訊，法院屆時會處理臨時禁制令嘅申請，預計聆訊需時三十分鐘。
卓妮