中環出更：訊心待外傭 無懼虐兒
香港人工作繁重，為咗兼顧好事業同家庭，唔少名人都會選擇聘請外傭幫手，但近期就出現唔少同外傭有關嘅意外，令人擔心外傭質素出現問題，甚至危害到家中幼兒嘅安全。不過，有三名子女嘅仁濟副主席王賢訊（Vincent）就話唔擔心。
仁濟醫院早前招待近五千名善長食盆菜，Vincent更加係全家到場支持添！佢透露，家中聘用咗三名外傭，但從來都唔擔心佢哋會虐兒，因為佢同太太都能夠將心比心，善待外傭，相信外傭能夠感受得到，之後就自然唔會傷害佢嘅仔女。
Vincent更對所聘用嘅外傭讚不絕口，而佢亦曾經聽親友講安裝錄影鏡頭監察家中一舉一動，但佢覺得做法違背咗自己對待外傭嘅態度，所以用咗一段短時間就將裝置全部移除，之後亦冇發生唔愉快嘅事件，相信佢呢個與外傭相處之道好成功喎。咁揀好外傭又有冇秘訣呢？佢話多數都係靠感覺，只要合眼緣就無問題咁話。
仁濟醫院總理鮑誠業就話自己無小朋友，所以無呢個擔心，加上多年嚟家中都無出現失竊問題，所以唔使擔心外傭會偷嘢。而另一總理鄭李華熙就話，家中有一位服務咗十五年嘅外傭，而且感情仲好好添！
周浩鼎訓練囝囝服從
育有一子一女嘅立法會議員陳恒鑌，因為唔習慣與陌生人同住，惟有太太辛苦啲湊小朋友。至於議員周浩鼎（Holden）就有個兩歲多嘅囝囝，雖然囝囝只識講簡單中文，但已經會咿咿哦哦扭計用電子產品。Holden仲話本身唔想囝囝咁早接觸電子產品，但依家就借呢個機會訓練佢嘅服從性，喺囝囝玩之前就講好數，再教導佢守承諾喇！
卓妮