中環出更：高官名人落力跑步籌款
健康快車香港基金尋日舉行慈善跑步行活動，有多個紀律部隊參與，包括保安局局長黎棟國、入境處處長曾國衞都有到場，其中入境處成為全場籌款最多嘅隊伍。曾國衞笑笑口話，入境處籌到最多錢，但就跑得最慢喎！健康快車創會主席方黃吉雯及副主席李寧都喺度，方黃吉雯就話，雖然近期經濟低迷，但係善款數字仲創新高添！
都市人工作繁重，好多人連做運動嘅時間都唔夠，黎棟國就係其中一個。記得早前佢出席活動時喺台上咳嗽，佢話近年工作忙碌而少咗做運動，令到身體差咗，前排去外地仲搞到氣管敏感，希望日後有多啲時間做運動喇！
郭晶晶驚囝囝落水
其實做運動嘅時間要自己安排，食物及衞生局常任秘書長聶德權就保持跑步習慣多年。佢透露，幾年前已經開始跑步，仲認真到搵教練添！現時雖然工作忙碌，但仍然堅持跑步，若時間唔夠最多咪喺屋企附近跑囉！他話，跑步毋須遷就其他人，而且運動期間可以整理思緒，有助減壓。
香港青聯前主席霍啟剛嘅太太郭晶晶隻身參加活動，問佢點解唔帶囝囝嚟，佢話要畀囝囝瞓多陣喎！晶晶係奧運跳水冠軍，唔知囝囝開始學游水未呢？佢笑稱原本諗住親自教囝囝游水，但跳水叻唔代表泳術高，佢只係識得基本嘅游水技巧。再加上囝囝一落水就好驚，不停叫媽咪，又攬到實一實，所以無辦法之下都要請教練幫手教。咁佢會唔會為囝囝追多個細佬或細妹，佢就話一定會，希望可以盡快聽到好消息喇！
卓妮