「一國兩制」聽得多，一間公司幾種退休年齡又聽過未？邊間公司咁騎呢？之唔係醜聞鑊鑊甘，管理立立亂嘅國泰航空囉！
話說國泰空中服務員工會尋日喺報章刊登聲明，投訴國泰雙重標準，空服員要喺五十五歲退休，而後勤、機師等職位可分別選擇喺六十歲及六十五歲退休。同樣係空中服務員，喺外站基地服務嘅可以選擇六十五歲退休，唔單止玩年齡歧視，仲玩埋地域歧視，員工唔嬲就假。最離譜嘅係，其他亞洲區航空公司空中服務員嘅退休年齡，差不多全部都高過五十五歲，印度航空五十八歲，菲律賓航空、中華航空同埋全日本航空，退休年齡更加係六十五歲添。
有工會人士就講得啱嘞，法例都規定六十五歲退休後至攞得強積金啦，國泰有咩理由另搞一套？話時話，隨着社會愈來愈老齡化，人均壽命愈來愈長，大部分人五十幾歲正正係年富力強，如果容許員工做多幾年，唔單止人盡其才，亦唔使等佢哋成為社會包袱，一舉兩得，何樂而不為？特別係香港，人均壽命全球冧巴溫，有乜理由空服員退休年齡全亞洲最早，印度人均壽命比香港短廿年，退休年齡反而遲三年，幼稚園學生都知唔啱數喇！
家有一老，如有一寶，一間公司亦係一樣，有經驗員工係重要嘅資產。呢，有人做過調查，大多數旅客最重視空中服務員對航空安全、緊急逃生設備嘅認識，以及應付緊急事故嘅能力，「年齡」反而唔係重要因素，國泰「貪新厭舊」，沉香當爛柴，你話係咪蠢到加零一吖。
係嘞，平機會平時咪成日宣傳「不論年齡，唯才是用」嘅，家陣國泰擺明玩年齡歧視，照計點都應該做番啲嘢，點知啱啱相反，佢哋強調本港現時未有消除年齡歧視嘅法例，冇法定權力處理有關投訴，淨係促請政府透過定期大型調查，密切監察年齡歧視普遍程度，講咗等於冇講，簡直吹脹。
講番國泰空服員退休安排，聽聞勞資雙方會喺嚟緊年終談判進行商討，拆唔拆得掂冇人知，但有樣嘢全世界都知，國泰內部管理混亂不堪，勞資糾紛不絕於耳，今次就話嘈空服員退休年齡，之前嘈機師人手編排，嘈加薪幅度，總之三日唔埋兩日吵一鑊，市民睇見都眼冤。
咁就難怪國泰服務水平不斷插水喇。好簡單，員工士氣低落，本身都帶住成肚火返工，服務想好都幾難；至於無日無之嘅工業行動，示威抗議，更加係搵着乘客嚟做磨心。
始終都係嗰句，家和萬事興，家衰口不停，國泰排名跌跌不休，有口皆悲，被愈來愈多市民唾棄，都係自己攞嚟嘅咋！