政情：監督鉛兇不力 馮宜萱反獲延任
去年爆出食水含鉛超標事件，事件轟動一時，當時房屋署副署長（發展及建築）馮宜萱承認，因認為「鉛兇」焊料細眉細眼，無做好監督工作，雖然經過特別調查委員會聆訊一輪，不過結果係無人受到處分。馮宜萱不單止唔使為事件孭飛，最近竟然仲獲得延長服務一年。
房屋署署長應耀康尋日喺官方刊物「曲線」公布呢個消息，佢撰文指未來幾年首長層嘅人手不足，為了解決問題，房署會請退休同事「再坐一會」。佢強調年屆六十歲後延長服務超過一百二十日嘅申請，係由公務員事務局審批，而按程序延長服務嘅有幾位首長級同事，包括馮宜萱，仲話同事願意「多走一步」，有助領導層交接順利啲喎！
據悉，馮宜萱獲批准延長服務十二個月，至明年十二月止。早前我哋就聽聞馮宜萱有意延任，但當時房署接受查詢時只係大耍太極。