政情：離任未換廣告牌 葉國謙冒認議員？
我哋早前報道過，前立法會議員葉國謙戀棧往日「班長」威名，在建制派WhatsApp群組賴死唔走，估唔到佢離任咗個半月，通街都仲係「葉國謙立法會議員辦事處」嘅燈箱及招牌，唔通佢眷戀往日議事生涯，去到不惜犯法冒認立會議員嘅地步？
相中呢塊寫有「葉國謙立法會議員辦事處」嘅燈箱，位於西營盤第三街嘅民建聯中西區支部辦事處門口，路人經過一定會望到。葉國謙嘅立法會議員任期到今年九月三十日為止，換屆至今已經一個半月，都仲未換番塊廣告牌，變相冒認立法會議員。根據《立法會條例》第七十三條，如有人在喪失議員的資格期間仍以該身份行事，每次最高可被判五千元罰款。如果以葉國謙離任至尋日共四十九日計，以每日五千元計，佢或有機會被罰款約二十四萬元。
不過，大律師陸偉雄就話，除非證明有人蓄意冒認議員，有意圖令人相信佢嘅虛假議員身份，咁先會入到罪。如果只係唔記得拆燈箱，係唔會構成罪行。我哋問過葉國謙惟未獲回覆。佢嘅黨友中西區議員蕭嘉怡指，已安排更換燈箱，因製作需時，稱會盡快更換。