政情：選委戰 中出 鄧飛 甩晒轆

今屆共有十人被選舉主任裁定提名無效，其中工程界佔六人，全部來自黎廣德牽頭嘅「進步工程」名單，另有高等教育界嘅張秀賢同體育界嘅麥錦燦，佢哋都被指與所屬界別未有緊密聯繫而喪失出選資格。不過，進出口界嘅陳玉仁同教育界嘅鄧飛，竟然因為無回覆選管會嘅選民確認信，結果被剔出選民名冊。其中陳玉仁原本可自動當選，如今令進出口界白白錯失一票。

象哥勞氣 斥有人失業界所託

據悉，陳玉仁早前搬屋，唔記得更新登記住址，佢又經常往返香港同北京，無留意選管會確認信，令「擺到埋口」嘅一席都食唔到。象哥尋日講起件事十分勞氣，佢不點名批評有人做事太馬虎，唔單止未能盡公民責任出選，更有失業界所託，直言被事件激到「紮紮跳」。

據了解，進出口界協調出嚟嘅十八人名單並非全部來自中出，因此未有人統一檢視名單各人嘅出選資格，但係中出各候選人都有互相提點，確保能夠證明同業界有緊密聯繫。中出高層透露，有關議席雖然令明年少咗一票選特首，但係對業界無直接影響，暫時亦只有象哥開火炮轟，相信對「豬隊友」陳玉仁無太大影響。

鄧飛報名已知未入選民名冊

至於另一「豬隊友」鄧飛，喺報名當日先發現自己唔喺選民名冊上，當時佢堅持報名，但亦難逃被取消嘅命運。佢事後強調無搬過屋，亦從來無收過確認信，對被裁定提名無效感到莫名其妙。其實佢應該早喺立法會選舉時已發現問題，但係佢稱聲當日事忙而無去投票，錯失改正機會。

教育界一向係非建制派嘅票倉，作為該界別建制陣營少有能夠拎到一席嘅鄧飛，竟然因為大意而「出師未捷身先死」。鄧飛最為人津津樂道嘅係佢曾主持電視節目《江山如此多FUN》，但係經此一役，睇怕大家只記得佢今次「江山如此甩轆」嘞！