中環出更：中風康復 謝鴻興街頭高歌
鍾意夾Band嘅香港律師會前會長王桂壎，早前同一班老友去油麻地廟街街頭表演做善事，香港醫學會前會長謝鴻興、立法會議員容海恩都去唱埋一份，謝鴻興仲唱咗六、七首歌，認真「長氣」。不過謝鴻興就自爆，今年年初中風爆血管，做咗兩次開腦手術，可以話死過翻生，為咗今次表演已經練歌練咗兩個月添！佢仲話，依家最重要係享受每一天。
謝鴻興話，好彩爆血管時喺屋企，任職護士嘅太太Polly發現得早，救佢一命，依家已經好番晒復工。Polly就話，當日朝早起身發現老公喺張床上呈半昏迷狀態，估佢係中風。因為驚打「999」送去公立醫院可能耽誤時間，所以即刻打畀住所管理處，又聯絡私家醫生朋友，跟住喺管理處幫助下坐上車，佢再開車送老公去私院接受治療。Polly話，見到老公可以繼續彈結他、唱歌已經好開心，不過如果恢復做運動就更好喎！
講番當晚街頭表演，今次已係王桂壎第二年參與呢個活動，佢八十幾歲嘅媽媽及太太May都有嚟捧場，仲大讚個仔由細到大唱歌都咁好聽。彈得一手好結他嘅王桂壎話，佢細個學音樂只係為咗扮型，依家可以娛人娛己兼且做善事，好開心。
容海恩唱金曲 全場拍手
同王桂壎相識多年嘅容海恩都係唱得之人，佢唱咗《月亮代表我的心》同埋《夜來香》兩首經典名曲，襯晒廟街嘅懷舊氣氛，唱完之後全場都拍晒手掌添！
卓妮