擁抱孤立主義嘅特朗普當選美國總統，唔少左膠好似世界末日咁，其實呢個係大勢所趨，家陣連歐盟都要收緊入境政策，阻止難民湧入，偏偏港府反其道而行，繼續中門大開，講得好聽就叫婦人之仁，講得難聽咪叫戇居囉。
係人都知，歐盟不嬲標榜人道主義，對難民來者不拒，結果唔止中東難民蜂擁而來，連恐怖分子都登堂入室，自食惡果。可能終於知衰啩，歐盟宣布收緊入境規定，原本可免簽入境歐洲神根公約國嘅約六十個國家及地區，包括香港在內，以後再冇呢支歌仔唱嘞，必須預先進行網上保安檢查手續，獲批至可入境，每位申請人仲要繳交五歐元費用，最快二○二○年實施。
雖然歐盟強調新規定係基於保安理由及防止非法移民，並唔係變相簽證，但畫公仔使乜畫出腸吖，好似香港人咁，去歐洲買名牌就話啫，邊會有人做非法移民喎，歐盟突然收緊入境政策，就係唔怕一萬，最怕萬一，事關恐怖分子無國界之分，佢哋最擅長整色整水用假護照潛伏入境，法國、比利時都係咁樣賴嘢，唔到歐盟唔學乖。再講吖，為咗照顧大量難民，歐盟早就左支右絀，家陣向旅客荷包開刀，當係幫補吓庫房都好吖。
大家睇到嘞，連言必大愛包容嘅歐洲國家都紛紛對難民落閘，英國仲率先脫歐，向難民說不，美國更加唔使講，特朗普發誓要將難民統統趕出境，仲要阻止部分國家嘅居民入境添，全世界好似剩番港府未瞓醒咁，繼續開門揖盜。呢，目前積壓嘅免遣返聲請個案已多達逾萬宗，加上不時有假難民偷渡入境，港府點增加人手加快處理都係無濟於事。使錢仲係其次，最大鑊係假難民恩將仇報，作奸犯科，各種罪案幾乎無日無之，成為香港嘅治安毒瘤，呢啲唔係貼錢買難受係乜吖？
好彩香港仲有第四權，多得《東方日報》鍥而不捨踢爆種種假難民亂象，港府總算肯做少少嘢，聲稱最快明年對印度客實施入境前網上登記措施，經評估後先至可以入境，希望從源頭減少假難民喎。老實講，港府一早就應該咁做啦，家陣已經算遲，何況「聲請大國」點止印度一個，做啲唔做啲，盞嘥氣嘅咋。
始終都係嗰句，與其揚湯止沸，不如釜底抽薪，要徹底杜絕假難民，只有退出聯合國《禁止酷刑公約》一途。唔係靠嚇，家陣歐洲關緊門戶，美國又話要喺邊境起圍牆，難民無處容身咯喎，隨時轉向香港埋手，港府繼續不設防，到時真假難民連埋恐怖分子三軍壓境，香港想唔死都幾難！