政情：公民講場：沈祖堯變臉評示威 被學生臨別「揪波」

兩年前佔領行動期間，有學生喺香港中文大學嘅畢業禮上舉黃傘，時任校長沈祖堯曾經讚揚學生，仲話尊重學生表達意見嘅自由。但尋日喺中大嘅頒授學位典禮上，當逾廿名社會科學院畢業生在場示威，舉起反釋法標語、撕毀印有特首梁振英頭像嘅單張同寫有「法治公義、三權分立」等字句嘅標語時，沈祖堯就話畢業禮係莊嚴場合，又係對大學同畢業生嘅一種尊重，學生示威係唔適當，對此表示遺憾。呢啲咪係佢當日縱容班學生而種下嘅惡果囉。唔知係咪佢可能最後一次主持畢業禮，所以先揪班學生。之不過，佢嘅批評都惹起學生不滿，又被揪番轉頭，變咗臨別揪波。