政情：陳沛然綠呔解謎：唔想撞色

選擇與立場無關

自稱中間偏黃嘅立法會醫學界議員陳沛然（Pierre），自選舉期間開始至今都佩戴綠色呔，不禁令人聯想起綠色領呔係咪同佢嘅立場有關。不過，謎底終於揭開，原來Pierre以綠色領呔示人，純粹只係喺選舉工程上避免同其他人「撞色」。

Pierre話喺出任香港公共醫療醫生協會前會長時，一向佩戴淺藍色或藍色領呔示人。但喺籌備立法會選舉時，對手精神科醫生黃以謙選擇咗藍色，而其他顏色同時又代表唔同黨派，最後只剩低綠色、粉紅色同白色。由於佢唔鍾意粉紅色，白色又唔多好，所以選擇咗綠色。

盛讚選舉對手黃以謙

當時Pierre屋企一條綠呔都冇，於是佢急急搵各方朋友幫忙，通知佢邊度有綠色呔，一收到通知，佢就衝去買，最後喺趕急嘅情況下都只係買到兩條綠呔。之不過，喺選舉過後，佢仍然要四處去搜羅綠色呔。

另外，佢亦大讚對手黃以謙嘅宣傳工作做得好，事關對方長期做地區工作，故網絡相當龐大，稍後佢亦會加強業內嘅溝通工作，畀大家對佢多加認識。