政情：建制英語水平 「鼎」力洗底
過往唔少建制派立法會議員嘅英語水平都麻麻地，仲鬧出唔少笑話，個別年紀大嘅議員甚至完全唔識講英文。不過，隨住今屆立法會建制派多咗幾位「海歸派」同來自法律界嘅議員當選，整體英語水平即刻拉番高。其中本身係律師嘅民建聯（民記）周浩鼎（Holden），當選後就多次選擇以英語喺立法會大會發言，希望為建制派洗底，搣甩佢哋「唔識英文」嘅標籤。
建制派議員講英文出醜事件，最經典係民記議員陳克勤首次當選時，將「try my best（盡我所能）」讀成「搓my breast（搓下我個胸）」，仲有同屬民記嘅前議員鍾樹根嘅港式英文「I don't think so囉！」兩件事都成為網民恥笑嘅材料。
非建制陣營水平跌
部分資深建制派議員，更多年來都拒絕以英語回應傳媒提問，令一眾本地英語傳媒同外國媒體好難做。而每當有外國使節或國會議員到訪立法會，亦好難先搵到足夠識得以英語對答嘅建制派參與會面，間接限制咗建制派聲音嘅覆蓋範圍，畀普遍能操流利英語嘅非建制派玩晒。
不過有關情況喺今屆立法會經已逆轉，建制派有多名新丁都曾經喺外國留學或來自法律界，無論喺會上發言、接受訪問或者接待外賓，都唔會出現語言障礙，佢哋包括民記嘅Holden同張國鈞、新民黨容海恩、獨立建制派何君堯、廠商會吳永嘉、鄉議局劉業強等。反觀非建制陣營方面，多位出名英文好嘅資深議員先後退休或落選，新當選嘅雖然大都叫做讀過大學，但部分人嘅英語發音似係中學生多啲，整體英語水平有下跌趨勢。
「多分幽默 少啲火花」
Holden尋日立法會就一項有關消防安全嘅動議發言時，無喇喇用咗英語發言，而且好流暢同發音正宗。Holden自言，選擇講英文並非為咗攞威，而係認為議員用英語辯論會多一分幽默感，少一啲「火花」，令大家都冇咁躁。佢又話除咗上述建制新丁，其實多名非首次當選嘅建制派議員英文都好好，包括民記主席李慧琼、漁農界嘅何俊賢、經常到外國訪問同旅遊嘅葛珮帆等。佢仲嘗試同克勤平反，話對方英文其實都OK，間中亦都有同外國使節會面，能夠以流利英語溝通。