中環出更：廿示威者踩上門轟漢奸黎「千古罪人」
反壹傳媒黎智英（漢奸黎）嘅行動持續，尋日再有二十名聲稱自發嘅人士，踩上漢奸黎寓所外示威，佢哋拉起「黑金亂港 千古罪人」等橫額同標語，怒轟漢奸黎係賣國賊，又高呼要打倒走狗漢奸黎。
斥「大魔頭無恥至極」
示威者尋日朝早約十時抵達漢奸黎位於何文田嘅寓所外，佢哋手持印有「黑金亂港 千古罪人」、「大魔頭黎智英 無恥至極」及「打倒走狗漢奸黎智英」等標語及橫額，又大叫口號，怒斥漢奸黎反中亂港，係賣國賊，佢哋逗留至十時二十五分和平散去。
近期針對漢奸黎嘅示威行動不絕，自六月十日起計，至今已踏入一百六十一日，連同尋日行動在內，到漢奸黎寓所外及將軍澳壹傳媒大樓外示威嘅行動最少達八十九次，當中自稱霸王國際集團員工及苦主佔十次、正義聯盟佔三次，旅遊業界及其他人士則有七十六次。
卓妮