中環出更：麥瑞琼退而不休 另覓新開始
依家人均壽命愈來愈長，好多人到咗退休年齡其實都仲係有心有力，有啲人選擇遲啲退休，有啲就退而不休忙於其他興趣。尋日卓妮喺一個畫展度遇到啱啱退休兩日嘅香港零售管理協會前主席麥瑞琼，見佢精神奕奕完全唔似已經退休，唔通佢有嘢想做？佢就話之前實在太頻撲，一星期飛足五日，去兩、三個唔同地方，冇晒自己時間，覺得係時候抖一抖啫！
麥瑞琼又話退休唔只係一個階段嘅小終結，仲同時係另一個階段嘅新開始，又笑言呢兩日收到好多WhatsApp同電話打嚟問佢有冇事，佢初頭好驚訝以為做乜嘢，原來係因為佢平日習慣忙碌，啲同事驚佢適應唔到退休，所以打嚟關心佢。而同佢相識咗廿幾年嘅老友、香港女工商及專業人員聯會理事韓淑儀就話，當日嘅顯能創作「無聲繪畫生活」高楠作品展係麥瑞琼退休之後第一個出席嘅公開活動喎。
講起退休生活，麥瑞琼除咗諗住出一本書透過分享佢嘅人生經歷散播正能量外，仲多咗閒情逸致去修甲同扮靚，不過見佢個標誌髮型好似咁多年都冇變過，唔知退休後會唔會嚟個大變身？佢就話自己頭髮好幼，自從廿幾年前髮型師幫佢剪咗呢個頭之後佢好鍾意，每朝吹兩、三分鐘就出得門，完全唔使Gel，所以唔會轉；不過佢都試過其他髮型o架，就係去派對嘅時候嘞！仲畀我哋睇佢笠住個長金髮戴住心形太陽眼鏡嘅相。
高楠冀培育弱能藝術家
當日展覽展出逾四十幅畫家高楠的作品，三歲時因病失聰嘅高楠透過翻譯表示，有同顯能創作及雲峰畫苑合作，為培育更多新進弱能藝術家出一分力，將佢哋嘅才華同商業接軌。
卓妮