早前內地央視四圍訪問途人，問對方幸唔幸福，結果答案千奇百怪，以致笑話百出。好嘞，咁如果同樣問題問香港人，情況又會點呢？唔使問阿貴，答案只得一個，咪係苦過弟弟囉。
呢，有機構尋日發表港人幸福指數研究報告，指出本港經濟喺過去十五年雖然有所增長，實質人均本地生產總值累計增長近百分之五十七，但同期港人幸福指數只係輕微上升百分之零點四，根本唔成比例。該機構嘅結論係，經濟發展未必能讓市民幸福。
講真，呢啲都係一字咁淺嘅道理，連小學生都明。好簡單，如果經濟發展成果唔能夠雨露均霑，無論個餅做到幾大，對基層市民嚟講一樣係有得睇冇得食。港府日前公布《貧窮情況報告》，發現貧富差距再度擴大，經濟發展變咗少數權貴富豪嘅盛宴，基層只能分到餸頭餸尾，證明高官成日吹噓嘅所謂「滴漏效應」，完全係隨口噏當秘笈。
其實又唔使下下睇調查數據嘅，大家睇吓自己個荷包就夠。就當閣下可以好似公務員咁人工年年跳point，收入增長真係追得上經濟增長速度，斷估點都追唔上樓價飆升速度啩。一般基層市民固然買唔起樓，大學畢業生人工二十年原地踏步，同樣只能望樓興嘆，再加埋港府起公屋慢如蝸牛，輪候上樓條隊長過萬里長城，咁就難怪劏房戶愈來愈多，雞棚豬欄貨櫃改建嘅劏房一樣大把人爭。你話嘞，市民連安居樂業咁基本嘅要求都滿足唔到，仲講咩幸福吖。
話時話，香港地除咗住屋難，安老難，就醫難，教育亦出咗好大問題。睇吓家陣班細路，畀朝令夕改嘅教育政策搞到暈頭轉向，升學競爭又大，小學生已經話有抑鬱症，真係聞者傷心，而即使爭贏咗，升得上大學又點？上流無望兼成身學債唔在講，一個唔好彩誤入歧途，成日掛住搞政治抗爭，甚至流落街頭淪為黃衞兵咁就弊啦，你估人人可以做到月薪九萬幾嘅議員咩，家長唔閉翳就假。
總而言之，回歸後香港每況愈下，衣食住行樣樣難，生老病死皆不易，加上政治環境複雜，部分政客唯恐天下不亂，成個社會紛紛擾擾，嚴重撕裂，直頭令人窒息，同香港人講幸福，同問饑民「何不食肉糜」一樣咁離地嘅咋。
當年列根挑戰總統卡特，淨係問民眾「生活係咪比四年前更好」，就足以成功KO對手。過去四年，港人有苦自己知，如果唔係，就唔會愈來愈多人用腳投票，移民外國喇。講到尾，香港係咪有轉機，港人能唔能夠重新搵到幸福，就睇中央有冇魄力撥亂反正嘞！