政情：議員兼秘書 陳振英頻OT
立法會正式開鑼，首次當選嘅金融界議員陳振英（Ronick）亦展開議員生涯。本身係中銀香港董事秘書嘅Ronick出任議員後，要身兼議員同公司秘書兩職認真辛苦。好似尋日咁，佢為咗趕及八點半返立法會開會，朝早五點就要起身，六點出門口，七點返到公司處理文件，之後先趕返立法會。佢仲話，依家幾乎日日都係咁，唔止佢工時超長，就連佢秘書都要作出遷就，齊齊超時工作。
Ronick話，因為依家成日都要留喺立法會開會，但佢仍然係公司秘書，所以仲要負責簽發文件，包括中銀香港收購中銀馬來西亞，有關文件都係佢負責。為咗簽發文件，佢好多時都要晨咁早，又或者到夜晚立法會開完會先至可以返公司簽收，連帶佢秘書亦都經常長時間工作，做秘書嘅秘書都係咁辛苦。不過，佢就話自己作為管理層都算有「良心」，會畀番適當薪酬留住好員工。
已向公司申請調職
Ronick已經同公司提出調職，調去啲冇咁困身嘅職位，依家等緊公司安排，相信到時「薪酬結構」會有所調整。錢就搵唔晒嘅，希望佢之後唔使再捱更抵夜啦。