政情：姚松炎右眼紅腫唔影相
泛民功能界別議員組成嘅「專業議政」，近日再新增一人加入，就是來自護士協會（護協）嘅衞生服務界議員李國麟。專業議政副召集人葉建源話，護協早前已經開會通過李國麟加入專業議政，而李幾日前亦已正式加入。現時專業議政總共有七名議員，同民主黨議員人數一樣多，並排成為泛民最大政團之一。
李國麟加入專業議政
除咗人數有增長外，專業議政亦為立法會帶來新突破，就係社福界議員邵家臻做咗福利事務委員會主席。邵家臻係新當選議員，但係立即成為事務委員會主席，應該真係前所未見。
至於專業議政嘅另一名成員建築、測量、都市規劃及園境界議員姚松炎，尋日見佢右眼發炎紅腫，原來感冒菌上眼，依家食緊抗生素，不時要抹眼淚，有記者行近佢右邊時，佢亦舉手叫人唔好影佢右邊臉，因為佢右眼不能夠受強光照射喎。