政情：劉業強顧得立會難理鄉議局
鄉議局主席劉業強（Ken）作為新任立法會議員，尋日因為忙於參與各事務委員會嘅正副主席選舉，無法抽身主持鄉議局執委會會議，要交由副主席張學明主持。不過，Ken似乎事前無充足交代，搞到有部分議程要留待下次會議再作討論。
張學明臨急代主持會議
張學明話，好遲先知道尋日要代為主持會議，但就話無令佢準備不足。不過，睇番會議過程，有數個項目本身由Ken負責匯報，但因為佢缺席而無人能夠代為講解，結果要順延至下月會議處理。當中包括討論向鄉議局研究中心撥款時，張學明就話因為Ken無吩咐落而無法代為解釋有關項目，仲反問研究中心呢兩個月仲夠唔夠錢出糧，夠就留待下月決定喇。
另外，鄉議局日前租借場地予民主黨辦活動時，冷氣出現故障，當時在場嘅鄉議局研究中心主任薛浩然就話，冷氣故障無法預知，好似飛機都會突然飛唔起，所以唔存在整蠱，更借機話有啲政黨賤格，乘機踩鄉下佬一腳喎！唔知佢係咪鬧民主黨賤格呢？