政情：十大議員 「游」「鼎」墊底

今次調查在九月二十六日至本月十三日分兩階段進行，要成為十大議員嘅先決條件係市民熟悉程度，之後先根據支持度排名，所以部分乞人憎嘅議員都會上榜，但通常會包尾。好似上屆經常拉布搞事嘅長毛，雖然多人識，就經常出現喺榜尾，即係評分差無民望，喺市民心目中只有壞印象囉！

阿鼎指日久見人心

不過，換屆之後，雖然梁國雄評分繼續低開，只得三十九點八分，但亦只夠「保八」，皆因有兩個新丁議員得分比佢仲低。其中一位，正是上星期宣誓過程中講出「支那」辱華字眼兼爆粗嘅游蕙禎，佢評分只得三十七點四分，反映其言行同立場並未得到市民支持。而同游蕙禎一樣喺宣誓辱華嘅青年新政梁頌恆，就連榜都入唔到。

不過，低處未算低，民記新人阿鼎評分低見三十六點七分，一上榜民望即時墊底，認真慘情。如果再仔細睇，阿鼎喺市民眼中嘅認知率唔差，有百分之七十一點二，講白啲，即係好多人都識佢，但就有負面印象。阿鼎回應時就不點名批評話，部分議員講出辱華字眼係「博出位」，而佢係做實事，市民遲早會知，仲話民調用嚟參考吓啫。

市民留意新丁表現

其實唔係所有新丁都要時間證明自己嘅，好似朱凱廸得分高達五十六點五分排第二，只係僅次於現役最資深議員、獲五十七點三分排首位嘅涂謹申。至於同樣首次上榜嘅新丁香港眾志羅冠聰就排第七，評分有四十五點四分。其餘上榜嘅議員仲有新民黨田北辰同葉劉淑儀、民記李慧琼同人民力量陳志全。值得留意嘅係，頭十二位市民最熟悉嘅議員中，有一半都係首次擠身議會嘅新人，證明市民都非常關注新丁嘅表現。