行政署提交本年度嘅立法議程，計劃向立法會提交十九條草案，當中以食物及衞生局局長高永文佔五條最多，雖則係孭重飛，但其實滿布炸彈，尤其係上屆立法會因拉布被拖死、涉及醫務委員會改革嘅《醫生註冊（修訂）條例草案》，事關依家連三方平台都未成立，加上喺上屆瞓身拉布嘅「醫改殺手」、醫學界前議員梁家騮（怪醫）將會加入三方平台，隨時又會反枱，唔知最後會唔會又爛尾收場。
除咗被拖死醫委會改革嘅條例草案之外，仲有排喺其後嘅《私營骨灰安置所條例草案》同《消防（修訂）條例草案》亦會重新提交立法會。
高永文除咗負責醫改同骨灰龕草案外，佢仲要孭多三條草案，包括《中成藥中醫藥（修訂）條例草案》，賦予衞生署署長法定權力回收任何對公眾健康構成風險的中成藥，以及規管香港供應及使用醫療儀器嘅《醫療儀器條例草案》，另有《私營醫療機構條例草案》，涉及改革規管私營醫療機構的制度。
新一屆立法會開鑼已經立立亂，首日會議就被本土自決派癱瘓議會，呢十九條草案能否過關都好難預料，特別係高永文負責嘅醫委會改革草案，唔知怪醫會唔會又再發難玩嘢。再加上「中間偏黃」嘅醫學界議員陳沛然亦曾經講過唔排除會拉布，睇怕高永文都未必可以輕易過關，唔知佢仲有乜嘢板斧去拆彈呢？
卓妮