中環出更：即席揮毫 名人兼融英數
好多名人出席活動時都會被邀請題字，但好多時嘉賓來自唔同專業界別範疇，書法未必係強項，活動主辦機構都會微調遷就吓。藝育菁英早前為明年香港歷年來最大規模水墨畫展舉行啟動禮，並宣布徵集優秀作品，藝育菁英主席方黃吉雯同一眾嘉賓就齊齊喺台上即席揮毫題字，但今次佢哋三兩下手勢就搞掂，原來大部分人題嘅都係英文同數字，唔怪得咁快手啦！
話說藝育菁英為明年舉辦嘅「全球水墨畫大展」募集作品，民政事務局副局長許曉暉、現代水墨畫大師王無邪、康樂及文化事務署副署長吳志華及策展人郭浩滿都有出席。講到題字，當然難唔倒寫開書法嘅許曉暉，但問佢係咪第一次用毛筆寫英文字，佢就話「梗係唔係」，以前練書法咩都會寫吓，唔好話英文，連星星都會畫喎！佢仲話，筆畫愈少嘅字愈難寫得靚，反而筆畫多嘅字就容易取得平衡，就算其中一筆寫得唔好都仲有得補救。
方黃吉雯就話冇學寫書法，但學過水墨畫，皆因佢哋之前有邀請一班大師開班教水墨畫，佢都要識畫先得。講番今次展覽將會展出一百位特邀畫家嘅傑作，以及公開募集同評審選出四百位來自世界各地傑出水墨畫家嘅作品，喺明年八月免費開放予公眾入場參觀。
方黃吉雯邀畫家展珍藏
方黃吉雯仲話，今次一定會揀每位畫家最靚嘅作品，但點衡量係咪最靚呢？佢就笑言通常最靚嘅都唔會流出市面，而係畫家自己收藏嘅，佢就試過喺慈善拍賣時，因為唔捨得而投番自己幅畫，所以佢會邀請各畫家獻出自己最珍而重之嗰幅作品參展！
卓妮