政情：郭家麒難忘兒時擺檔賺錢
隨住時代轉變，墟市幾近絕迹，但近年古老當時興，愈嚟愈多組織再搞番墟市，仲搞埋墟市節添，等大家感受吓本土文化之餘，仲可以緬懷過去。立法會議員郭家麒透露，其實佢讀小學二年級時都做過墟市檔主，喺石硤尾擺檔，將自己睇完嘅公仔書賣番出去。至於賺到嘅錢，佢就會拎去附近攤檔買缽仔糕同啫喱。
同場嘅立法會議員羅冠聰（Nathan）就話，佢自細喺東涌逸東邨長大，由於路途遙遠，再加上啲餐廳又收得早，所以返到東涌就會幫襯小販檔買嘢食醫肚。Nathan話，最近啲小販管理隊掃蕩力度加強咗，原來係因為逸東街市做埋深宵時段。不過，佢就批評啲食物質素比較差，同時小販檔都因為被食環署同領展夾擊下，加價近一倍，一碗生菜魚肉由十零蚊變成廿幾蚊。
羅冠聰冀空地搞墟市
有見及此，Nathan希望政府可以善用土地資源，利用閒置空地搞墟市。郭家麒都話，未來會喺立法會內務委員會上提出成立墟市小組，希望每區都可以搵到公共空間去搞墟市，令墟市成為社區嘅一部分。