政情：CY扶貧走數 何喜華批不合格
特首梁振英（CY）任期所餘無幾，上周六佢就喺扶貧高峰會後，回顧現屆政府嘅扶貧政策，話現屆政府「破天荒」設立貧窮線，仲話「無咩政府有呢個勇氣」喎。當年全力支持CY選特首、之後獲委任為扶貧委員會委員嘅社區組織協會主任何喜華，近年對CY嘅支持度已改變，近日更指CY整體扶貧工作唔合格，愈扶愈貧。加上曾任CY競選辦主任嘅行政會議成員羅范椒芬早前公開叫CY「反思」，睇嚟現屆政府愈來愈不濟，眾叛親離。
封後門 特首人選無立場
事隔五年，再見已經不是朋友。上屆特首選舉，何喜華主動安排CY及唐英年兩人落區探訪基層劏房戶同露宿者，之後何喜華就戲劇性被CY一句「我感覺到呢一啲人都好抑鬱」而觸動到。但傳統政客往往係「講就天下無敵，做就有心無力」，一三年時，CY上任年幾都仲係用「政策仍在研究階段」做擋箭牌。當年何喜華聞到走數嘅味道，已經打定開口牌話CY如果駕馭唔到公務員系統就乜都做唔到，仲講明CY表現「十分只值五分」。
直到一四年，CY話如果有公民提名，政府嘅政策就會傾斜向月入低於萬四蚊以下嘅人。何喜華就對呢番言論有極大反彈，覺得CY標籤窮人，令佢好傷心、好失望，仲透露CY已經兩年無同佢見面，名副其實比人過橋抽板呀！
何喜華依家已經封定後門話對特首人選無既定立場，換句話即係唔一定支持CY連任啦！佢話明白現屆政府「時日無多」，只係想未來五個月政府可以集中處理全民退保政策。其實試過畀人過橋抽板，見過鬼都應該怕黑啦，仲想靠個政府幫你搞退保？
政府冇靈魂 頹勢難挽回
至於羅范椒芬，早幾個月前出席一個活動時，都被問到係咪支持CY連任，但佢冇表態，又重申唔會再幫手助選，更表明希望施政報告加入全面反思嘅部分添！雖然佢未至於掉轉槍頭，但同何喜華一樣對CY嘅支持度已經有所改變，遲吓會唔會倒戈相向，實在好難講喇。一句講晒「冰封三尺非一日之寒」，政府冇靈魂，CY實在責無旁貸，但現屆政府任期所餘無幾，睇怕想挽回頹勢都幾艱難。