香港地百物騰貴，幾十年前經典歌詞「你怕，我怕，個個怕，煙加酒加屋租加」，今日一樣適用，而即使閣下唔係煙民又或者好杯中物，始終都要搵個竇口遮風擋雨，屋租點加都要焗啃，箇中苦況，全港二十萬劏房戶可謂點滴在心頭！
有團體研究發現，今年劏房租金比去年上升近一成四，足足跑贏同期甲類住宅租金升幅達一點八三倍，如果計埋劏房業主向租戶收取嘅電費，差幅更加高達二點一倍；另一方面，劏房戶喺租金方面嘅開支又遠遠超過平均工資水平增幅，一來二回，話唔惡頂就呃人嘅。
好似有位女士咁吖，一家四口蝸居荃灣一間七十呎劏房，月租竟然盛惠三千八百大元，全「屋」淨係夠放一張碌架床同簡單家具。不過你咪理，咁惡劣嘅居住環境一樣有價有市，葵青區就有間一百呎劏房，月租夠膽死由舊年三千元加到今年六千元，唔少業主仲講明「你唔租大把人租」，一副皇帝女唔憂嫁咁款，問你服未。
咁就難怪劏房大行其道，遍地開花嘞。前幾日之嘛，本報就直擊元朗洪水橋新發展區被改建成「劏房區」，五千平方呎農地劏成幾排鐵皮屋，豆腐膶咁細收成三千銀月租，認真和味。至於其他由貨櫃、雞棚等改建而成嘅劏房，更加係無奇不有。
始終都係嗰句，有頭髮冇人想做瘌痢。公屋輪候時間已經突破四年大關，基層市民等到頸都長，唔租劏房唔通瞓街咩？查實好多劏房戶但求上到樓，已經唔理好醜，有人甚至連凶宅都照殺，可惜都係失望而回。話時話，無殼蝸牛無分年齡，望樓興嘆嘅仲有一班後生仔。今時今日大學畢業生收入不斷縮水，唔中六合彩頭獎都咪使旨意買到樓，後生仔想脫離父母自立門戶，惟有加入搶劏房嘅行列，結果導致啲單位愈劏愈細，愈裝愈豪，變相亦搶貴咗個市，令基層家庭生活環境每況愈下。
所以話，講嚟講去都係港府無能累事，之前明明講好十年興建廿九萬個公營房屋，依家又係遠遠追唔上目標，分分鐘彈票收場。有團體建議利用市區空置校舍設立過渡性房屋，安頓等候上樓嘅劏房戶，睇怕都係對牛彈琴居多。試諗吓，如果港府真係寸土必爭，地盡其用，一早收番公務員宿舍、私人會所土地甚至富豪高爾夫球場起公屋，而橫洲發展計劃亦唔使大幅縮水，搞到天怒人怨喇，吓話？
北大人當年警告，房屋問題處理不當，會演變成政治問題，果然不幸而言中。無恒產者無恒心，特別係年輕人，連安身立命嘅希望都睇唔到，唔離心離德至奇！