政情：公民講場：政府話冇地起樓「波」拋畀雙料議員

橫洲公屋風波未完，嚟緊立法會復會後包括鄺俊宇等「雙料議員」相信亦會跟進。發展局局長陳茂波（波叔）尋日發表網誌，話依家政治環境複雜多變，任何民生議題都可能被政治化，指政府需要平衡各方訴求，好多時「順得哥情失嫂意」，無法令所有人滿意。佢仲話政府同議員嘅角色雖有不同，但關係絕非對立，而新一屆有唔少「雙料議員」，希望議員可以提供有用建議，用嚟理順地區人士嘅矛盾。雖然區議員成日「貼地」接觸市民，但唔代表政府無份「落地」解決，佢依家咁講即係拋波啫！咁卸膊，難怪有議員話如果佢冇解決問題嘅能力，應要考慮退位讓賢喇！