政情：今日你上鏡：廖成利係莫嘉嫻囡囡契爺

民協前主席廖成利（老虎仔）前日五十八歲生日，另一個民協前主席莫嘉嫻就帶同兩個囡囡同佢慶生。嘉嫻話老虎仔係自己從政時嘅第一個師傅，兩人感情非常深厚，嘉嫻囡囡出世時，老虎仔唔單止幫手改名，仲主動要做埋契爺添！呢次係嘉嫻辭任主席之後首次同老虎仔見面，佢話老虎仔都好尊重佢嘅決定，兩代主席又有討論到民協前景，佢哋都認同係時候要將權力交畀年輕人，嘉嫻仲大爆老虎仔已經約見咗唔同嘅主席人選，睇嚟民協應該可以「後繼有人」喇！