政情：六年之癢葉劉田二少互轟
新民黨喺二○一一年成立，近日竟然爆出六年之癢，黨高層隔空互插。早前棄選立法會主席嘅新民黨副主席田北辰（田二少）尋日接受傳媒訪問時突然挑起火頭，話該黨頭目係行政會議成員，就變成政府黨，對黨長遠發展絕對係問題，又認為建制派需要改革，不應全由大黨指揮，問到點解建制派唔可以有六黨聯盟，相信係直指身兼行會成員嘅黨主席葉劉淑儀（葉劉）。葉劉接受查詢時話田二少不能選主席，心存怨懟係意料中事，但自己無愧於心，六年來一直喺選舉中支持佢，直指田二少係喺組黨後才能勝出，否則隨時等如西貢區議員方國珊（哪吒）一樣。田二少回應時則多次強調，佢哋只係理念唔同，唔代表不和。
葉劉話自己一直向田二少表明支持佢選立法會主席，但要顧全大局，新民黨亦冇支持暗票初選嘅建議，認為田二少不妨一試，但機會好低，明白佢有失望同怨憤，但自己無愧於心，指建制派早有共識係由葉劉自己或梁君彥做主席，雖然有民選基礎較好，但主席唔止要票數多，而係要講裁決，「否則鄺俊宇就最威啦」。
葉批對方不了解政制
葉劉又指民建聯（民記）主席李慧琼亦喺行會做咗好長時間，而民記同工聯會現時喺行會亦有代表，原因係政府喺立法會無票，需要建立執政聯盟，倚靠建制政黨，相信投票畀田二少嘅人都知道佢係執政聯盟一部分，而喺聯盟嘅好處係政府會吸納意見，批評田二少對政制一知半解。
田二少指因理念不同
被問到係咪同田二少不和，葉劉就話「佢同好多人都不和」，自己同佢合作六年，反問「佢同邊個和過？」，又提到田二少同佢哥哥田北俊當年組成嘅自由黨亦不和，做九鐵時亦發生「兵變」。至於會唔會同田二少分裂，葉劉就話由田二少自己決定未來去向，自己作為黨主席一直幫佢選舉，支持佢足足六年，如果佢唔組黨就等同哪吒一樣。據資料顯示，哪吒三戰立法會新界東都鎩羽而歸。
田二少昨晚回應，指理念上政黨主席唔應該係行會成員，正如經民聯及工聯會都並非派主席加入行會，呢個理念並非針對葉劉。佢又話如果葉劉當年有提及會做行會，自己亦未必會加入新民黨，不如做局長，認為二人立場與理念不同，溝通不密切，但無問題，可能對方覺得二人不和，但自己不覺得不和，但承認二人不常溝通，有時自己與葉劉喺一啲議題上立場未必一致，但葉劉嘅言論未必完全等如新民黨立場。佢又認為呢件事已發生，唔知未來六個月走勢如何，好多嘢都係未知數。