中環出更：美領事入「香」隨俗重陽登高
尋日係重陽節，好多人都會去掃墓或者登高遠足，而美國駐港澳總領事唐偉康亦專登帶埋老婆去行山，仲同老婆喺山上影相上載到facebook，話自己「聽說」香港人喺重陽節登高遠足係一個傳統習俗。
唐偉康仲喺facebook上預告，指自己同老婆已經探索咗一啲「美麗的遠足路徑」，仲話希望下次會喺山上見到大家喎。
事實上，重陽節係古時中國人為咗避免感染瘟疫，帶埋一家大細上山登高避禍，唔知唐偉康知唔知呢個節日嘅由來呢？如果大家下次真係喺山上遇到唐偉康，不妨向佢講多啲中國傳統節日嘅由來吖！
履新前拍片打招呼
其實唐偉康喺來港履新之前，曾經事前錄製咗條短片透過美領事館嘅社交網站發放，提早向港澳朋友打招呼，而喺短片開首同結束部分，佢仲以廣東話講出「大家好」同「香港見」添！當時佢仲透露自己過去曾多次來港，形容如今有機會將Fragrant Harbour（芳香的海港）稱為自己嘅家，對此感到興奮。
卓妮