中環出更：楊立門 梁卓偉琴歌和韻一拍即合
香港學生向來十八般武藝，識玩音樂更幾乎係報讀好學校嘅入場券，卓妮早前喺一個活動上見到班城中名人表演音樂，其中出名係「AO歌王」嘅民政事務局前常秘楊立門更大展歌喉，夥拍港大醫學院院長梁卓偉一彈一唱演出，吸引唔少政商翹楚嚟捧場。
香港藝育菁英早前舉辦慈善演唱會籌款，主席方黃吉雯（小吉）除咗自己身先士卒獻唱外，仲邀請一班出名唱得嘅老友幫手籌款。淡出官場後不時為慈善開金口嘅楊立門話，梁卓偉係個好有經驗嘅伴奏者，所以事前都唔需要練習太多次，對方會一邊聽住佢唱嚟夾番個節奏咁話。而曾經係梁卓偉學生嘅劉仲恒與太太，即馬時亨大女馬露明亦亮相鼓掌，至於聯合國兒童基金香港委員會主席陳晴望住台上表現嘅小朋友就變成小粉絲，舉埋手機拍低小演出者嘅可愛表現，難怪嘅，事關當中一個係佢囝囝嘛！
周永健同阿仔有火花
呢晚表演嘅仲有一向被讚歌喉好得嘅馬會副主席周永健同兒子周霩善。問佢哋平日喺屋企有冇一齊夾歌，周永健就鬼馬開玩笑話阿仔不屑同佢夾。咁佢有冇喺屋企彈結他？阿仔就搶答話係好耐之前嘅事，兩人台上台下都充滿火花，搞笑又精彩，博得台下掌聲四起。
小吉話籌得善款會用喺資助當晚獲得全港青少年繪畫日2016獎項嘅學生到俄羅斯國立藝術學院學習七日。佢又話香港有好多富有藝術天分嘅學生，佢哋會由十八區約百多名參賽入圍者經過決賽後再挑選約十名傑出者到外地交流。過去有兩年曾經帶學生到過北京學繪畫，而今年則係第三年帶得獎者到俄羅斯學藝，話當地藝術好多元化，啟發藝術靈感一流。
卓妮