係人都知，公立醫院前線人手長期不足，十個煲得七個蓋，病人輪診少啲耐性都唔掂，但如果話睇完症配藥都要走幾間醫院，前前後後足足搞成五粒鐘，大家又會唔會覺得誇張得滯？
呢嗱，珍珠都冇咁真（口架）。話說大嶼山居民盼星星盼月亮，三年前終於盼到北大嶼山醫院開張，點知該院話就話有廿四小時急症室服務，但藥房周末及周日只開半晝，公眾假期更加全日休息，搞到病人大失預算。啱啱過去嘅公眾假期，本報記者就直擊一名東涌居民喺北大嶼山醫院睇急症後，被告知藥房休息，要攞藥就要到其他廿四小時開放嘅公立醫院，等到病人揸車去到瑪嘉烈醫院，又發現藥房冇晒存貨，跟手拿拿臨撲去威院至叫做執齊晒啲藥，但已經擾攘咗成五粒鐘，你話唔（興）就假。
話時話，嶼院服務天殘地缺，配藥服務甩甩漏漏只係冰山一角。由於醫院不設兒科專科，有基層家庭病人被轉介到瑪嘉烈醫院，每個月淨係交通費都講緊成千銀，都咪話唔乸脷；咁都未算，嶼院樓高七層，但成層六樓到依家仲係烏燈黑火，事關延續護理病房尚未啟用，至於五樓嘅急症科病房亦只係開得一半，簡直吹脹。
今時今日咁嘅服務態度點得o架！有立法會議員就講得啱嘞，當初起北大嶼山醫院，就係因為東涌屬偏遠地區，依家病人攞包藥都要舟車勞頓，仲有冇再離譜啲。唔好忘記，未來幾年隨着港珠澳大橋通車以及公私營樓宇相繼入伙，區內人口勢必急增，試問嶼院點頂？再講吖，大嶼山發展遭遇地區反對，好大程度就係因為民生配套跟唔上，家陣連居民「看病難」問題都解決唔到，阻力只會更大嘅咋！
講嚟講去，問題癥結都係出在醫護人手荒。係人都知，本港每一千名市民只有一點八名醫生，相對英國嘅二點八名、美國嘅三點二名，足足輸九條街。之所以搞成咁，當局培訓人才規劃失當、人口老化、私院挖角無疑都係原因，但港產官僚無心無肺，搞到資源錯配，同樣難辭其咎。舉個例子，藥劑師工會早排先至喊晒口，話由於近期唔少藥房倒閉，市面上約有三、四十名藥劑師失業，而本地大學每年又有八、九十名畢業生，加上海外回流嘅藥劑師，唔少人都要透過工會幫手搵工，如果醫管局可以聘請呢班人，嶼院藥房服務就唔使半桶水，病人就唔使被玩到氹氹轉喇。
都係古人講得啱︰凡事豫則立，不豫則廢。港府口口聲聲未來十年新建、擴建多間醫院，可以增加五千張病床，問題係人手短缺問題一日唔解決，起再多醫院咪盞淪為嶼院翻版！