黃衞兵據云在泰國曼谷「蒙難」，事關佢應邀到泰國作「學術交流」，誰知一抵埗即遭泰國當局沒收護照，並關押在五十平方呎的「臭格」約十小時，不見天日，嚇到佢胡思亂想。他事後接受訪問時表示：「我腦裏面有一絲念頭，會唔會係桂民海翻版呢？我理性上不斷同自己講唔會嘅，點都返到香港嘅。」老朽不禁噗嗤一聲笑出來，心想只不過關押十小時，咁都叫「蒙難」？孫中山當年在倫敦街頭被挾持入清朝公使館，被禁錮咗十幾日，史稱「倫敦蒙難」，不過孫中山之後仍然奮不顧身，經過多次革命失敗，終於推翻滿清。今黃衞兵被關押十個鐘已嚇到鼻哥窿都冇肉，阿哥，你點去同人哋分享「雨傘革命」、「民主自決」呀？
黃衞兵希望「點都返到香港嘅」，梗係啦，香港幾好都有，帶頭「重奪公民廣場」都係判社會服務令，又贏得新任最年輕議員羅冠聰推崇佢「若非有聲譽和國際知名度，恐怕唔係遣返咁簡單」。老朽不禁大笑三聲：黃衞兵的國際知名度高得過「我沒有敵人」嘅劉曉波？好心唔好咁誇張喇！
當年爭取「真普選」，黃衞兵又學人「絕食」，卻是「飲用葡萄糖水的絕食者」，認真搞笑！如今「蒙難」十小時，回到有警察保護佢嘅香港，彷彿打了雞血，立刻成個人生猛晒，又開記招又在大氣電波中侃侃而談「十小時蒙難」感受，講到好似世界末日咁，更加大呼小叫冇人權。平安歸來就是好，卻還要瘋狂抽水，既然是不受歡迎人物，難道要人家高床軟枕、泰式水療服侍你呢個「大思想家」乎？
有泛民議員仲話要泰國政府給予恰當理由，阿哥，黃衞兵的所謂「交流」，明明是去散播佔領革命，輸出學運火花，泰國本來局勢已經唔多穩定，你黃衞兵還要來攪局，扣留你十個鐘畀你返香港，執番身彩，好心咪大言不慚講乜嘢人權喇！