政情：立會處女騷張國鈞談中史

立法會新丁議員張國鈞過往喺區議會多數關注房屋議題，亦有幾項與房屋有關嘅公職，例如長策會委員、房委會委員等。不過進入立法會後，佢就擔任民建聯嘅教育事務發言人，而唔係佢熟悉嘅房屋事務。下星期立法會開會之後，佢躋身立會後嘅首個議案亦同教育有關。

張國鈞透露，經過抽籤後，佢將會喺首次會議提出與修訂中國歷史科有關嘅議案。該次議案主題與教育局發出嘅諮詢文件接近，惟佢強調事前冇同教育局接觸，佢認為有關議案並非冇爭議，預料會有議員辯論時大談六四。

張國鈞話，佢喺選舉時政綱已提及教育，加上佢有兩個女，所以佢都好重視教育，唔代表放棄咗房屋議題，因為佢已打算加入幾個與房屋有關嘅事務委員會。

此外，民建聯喺港島區議席減少，張國鈞形容目前資源緊絀，可用嘅資源比以往減半，未來或需將人流較少、用作儲物嘅辦事處關閉。