政情：吳得掂外訪提「治國」亂噏當秘笈
外訪當食生菜嘅教育局局長吳克儉（吳得掂）日前去咗秘魯利馬，出席第六次亞太區經濟合作組織教育部長會議。吳得掂喺會議上除咗介紹香港教育同課程改革，仲引用孔子《禮記》嘅《大學》篇其中一句「修身、齊家、治國、平天下」，話係香港教育嘅目標喎！不過吳得掂自上任後風波不斷，無論係教師抑或學生都對佢劣評如潮，試問身為局長嘅佢都其身不正，竟然夠膽擺孔子上枱？
其身不正 擺孔子上枱
吳得掂人如其名就眾所周知，自上任以來所推出嘅計劃都備受批評，當中包括國民教育風波、小三全港性系統評估（TSA）事件、同埋一帶一路獎學金計劃。吳得掂除了無能，仲頻頻外訪當旅行，即使有大事發生都係放假大過天，搞到民怨沸騰，佢連修身都做唔到，遑論齊家、治國喇！
吳得掂「亂噏當秘笈」都唔係新鮮事，依家佢突然心血來潮，亂咁以「治國」來形容治理香港，有冇諗過今時今日喺香港，呢個「國」字好敏感？香港根本唔係一個國家，唔通佢想宣揚港獨，為香港添煩添亂？