中環出更：民主阿婆 李漢奸離港前密會漢奸黎「領旨」？
多次去外國唱衰香港、屢試屢敗嘅「民主阿婆」前政務司司長陳方安生同有「李漢奸」之稱嘅民主黨創黨主席李柱銘，原定尋晚又出發飛去澳洲同新西蘭。但佢哋兩人尋晚就同壹傳媒黎智英（漢奸黎）夫婦去咗上環九如坊一間日本壽司刺身蟹店食飯，似係漢奸黎喺佢哋出發前幫佢哋餞行。唔通民主阿婆同李漢奸唱衰香港前，要向漢奸黎領「聖旨」？
尋日傍晚六時，漢奸黎同佢太太先後去九如坊一間日本餐廳，冇耐李漢奸夫婦亦同一名女子到達。約八時許，民主阿婆突然喺餐廳出嚟，再搭佢自己嘅七人車離開。漢奸黎夫婦、李漢奸夫婦同埋女友人亦相繼離去。
赴澳紐13日晤當地官員
民主阿婆同李漢奸原定尋晚飛往澳紐，展開為期十三日嘅行程。佢哋會先去澳洲坎培拉同當地官員會面，再到悉尼智庫洛伊國際政策研究所演講，然後轉往新西蘭威靈頓演說及同國會議員會面。兩人計劃講述上月立法會選舉情況，同反映中央干預香港事務愈嚟愈嚴重。佢哋之前都試過喺英國唱衰香港，但就碰到一面灰，唔知今次會否再自取其辱呢？
卓妮