中環出更：煙花浪漫小「妮」子難忘拖手仔
早前灣仔會展中心舉行十一煙花匯演，近千政商名流都去近距離欣賞璀璨靚景。講起睇煙花嘅經歷，活動籌委會常務副主席陳李妮（Lily）自爆一段難忘嘅故事。話說當年有個男仔約佢一齊睇煙花，Lily原本對個男仔冇乜特別感覺，但後來被煙花浪漫氣氛感動咗，睇完煙花兩人自自然然就拖手仔喇！Lily笑稱，依家諗番轉頭，覺得呢個男仔都幾聰明，識得利用浪漫嘅煙花場景追女仔喎！
同場仲有海南省港區政協委員聯誼會會長張學修、中華出入口商會前會長莊成鑫等人。莊成鑫一早就入場，仲忙於招呼一班年輕人，原來佢身兼香港跳繩體育聯會榮譽會長，當晚特登帶十幾位香港跳繩代表隊成員去表演。唔知莊成鑫跳繩係咪好叻呢？點知原來佢最近啱啱開始學跳繩，每次只係跳八十多下，花式更加未識跳。佢笑笑口話，一、兩年前先至認識聯會，如果早啲認識，多啲跳繩，身形就會Fit好多喎！
莊成鑫仲話跳繩好處多，唔止對心臟好，感覺腳力都好番啲。聯會主席梁健璋就補充話，跳繩係好好嘅帶氧運動，跳十分鐘等於做運動三十分鐘，加上唔需要好大空間，所以啱晒屋企細又忙碌嘅香港人。
張心瑜健康飲食keep fit
仁愛堂前主席張心瑜（Fiona）及香港陝西聯誼會會長鄭翔玲都有到場。卓妮見Fiona身形愈來愈fit，原來佢唔止堅持日行一萬步，仲奉行健康飲食習慣，夜晚再戒埋食澱粉質食物，難怪狀態大勇喇！
卓妮