香港早已淪為假難民港，三日唔埋兩日就有相關嘅新聞，嗱，尋日法庭開庭審理一宗協助人蛇偷渡案，法官一錘定音，內地蛇頭被判入獄四十二個月。相信好多市民都同功夫茶一樣（搲）爆頭：唔係啩，人蛇大軍壓境，假難民無惡不作，判咁輕點會有阻嚇力吖？
話說一名內地漁民較早前駕駛冇消防及救生設備嘅機動舢舨，運送二十名南亞裔人蛇由海路抵港，途中被水警截獲斷正。此案尋日判決，被告身為船長而其船上載有尋求非法入境人士，以及危害他人海上安全兩罪成立，被判入獄四十二個月。
蛇頭獲刑當然罪有應得，問題係踎三年幾，係咪罪責相當呢？有冇反映到人蛇問題嘅嚴重性呢？法官係咁講嘅，今次涉案船隻運載人數多，案中非法入境者全部提出酷刑聲請，而且有漁船帶領，有一定組織性。講到咁嚴重，判決卻手下留情，同新修訂法例嘅最高罰則監禁十四年差成大截，唔怪得成日有人話司法機構一味效婦人之仁喇。
不過法官嘅睇法就唔同嘞，佢話留意到呢類案件大同小異，希望控方考慮係唔係需要提交更多詳細資料，等法庭量刑時可以考慮相關嘅組織性同猖獗性。咁即係點？即係律政司「做漏招」囉。話時話，今次已經唔係律政司第一次犯同類錯誤。區域法院七月判處蛇頭入獄四十個月，當時法官同樣開口提示控方提供多啲資料，方便法庭參考對涉案蛇頭加刑。成日話治亂世，用重典，律政司做嘢甩甩漏漏，烏龍百出，條例定得再辣都係嘥氣。
嗱，一眾蛇頭及人蛇固然要多謝律政司，但亦千祈咪忘記慈悲為懷嘅青天大老爺。法庭曾一再判入境處「非法」拘押假難民「唔人道」，有啲判一日賠償一千蚊，有啲賠二十幾萬銀，假難民衣錦還鄉，一傳十十傳百咯喎，唔爭崩頭湧港至奇喇。
唔知大家覺唔覺，假難民話就話係涉險偷渡，但過程其實十足十「旅遊套票」，有疑似警隊高層包庇南亞人蛇犯罪集團，旅途順暢唔在講，到埗後只要舉手，行街紙在手等於領正「免死金牌」，鍾意打黑工又得，食大茶飯搵真銀又得，劈友販毒非禮又得，用香港納稅人嘅錢同港府打官司都仲得，就算一個唔好彩失手就擒，監獄好食好住，連家鄉菜都serve埋，咁無微不至嘅款待，唔捧主人家場都好唔畀面啫吓話。
所以話，一隻手掌拍不響，律政司漏招固然累事，司法機構慷納稅人之慨，港府麻木不仁，引狼入室，統統都係假難民禍港嘅「共犯」！