政情：八網難逃：陳恒鑌惡搞PPAP 放片玩埋阿婆
來自日本嘅洗腦神曲《PPAP》呢期爆紅，雖然好多網友一邊睇，一邊就笑佢低能，可能就係貪佢夠低能，警察抄完《PPAP》，二次創作Belt & buckle用嚟提醒市民扣安全帶之後，民建聯（民記）嘅立法會議員陳恒鑌（Ben）都玩埋一份。
網友取笑只得阿婆支持
話說阿Ben辦事處幾個同事夾手來腳惡搞咗一條《BPLP》，仲放咗條片喺阿Ben facebook粉絲專頁，佢哋解釋首歌係想表達「Ben辦阿婆愛阿Ben」，仲話到自己「have a 批 of 阿婆」，大晒自己喺新界西有好多婆婆支持。
但有網友就話條片唔係好啱睇，留comment鬧爆「（你哋）咪就係得啲阿婆支持囉！」但Ben辦嘅同事就笑笑口回覆：「有阿婆支持係榮幸，遲吓可能阿公阿B都鍾意^^」。依家好多政黨都用網上平台嚟搶年輕人嘅支持，勢估唔到阿Ben竟然轉攻長者，咁佢就要落力咁開多啲班，教多啲公公婆婆上網嘞！