自由黨新一屆領導層提名期已經開始，一直主事領導層嘅榮譽主席田北俊（田少）早前指現任黨主席鍾國斌（Felix）將會接任黨魁，而主席一職則會懸空，但據知黨內有唔同意田少建議嘅聲音，並提出由Felix接任黨魁，主席則由飲食界議員張宇人（Tommy）接任，意味着自由黨進一步去田少化。
隨住田少正式退下火線，加上黨魁方剛交棒，令外界關注接任人選誰屬。其實喺早前田少指Felix將會接任黨魁，主席一職將會懸空後，已傳出呢個只係田少嘅意見，黨內仍有其他聲音。據知，自Felix日前外遊回港後，黨內曾再次討論領導層人選，而黨內有聲音提出，由Felix接任黨魁，主席之位亦唔應該懸空，應由資深議員接任，有人提出由Tommy出任。提名期將於星期五結束，相信呢兩個職位好大機會只接獲二人嘅提名，即會由二人出任。
田少多年來喺黨內曾先後出任黨主席同黨魁，其後失去全國政協一職後便辭任黨魁，加上喺今屆選舉中退下火線捧新人，外界一直關注田少喺黨內嘅影響力會唔會大減，今次領導層更改後，相信田少唔會出任領導層嘅職位，加上已經唔係立法會議員，可見田少主事時代好大機會正式告終。