特首梁振英（CY）早前向《蘋果日報》發出律師信，批評對方有關佢收取澳洲企業UGL五千萬元「回佣」嘅報道無任何根據，要求對方澄清及撤回有關報道，佢尋日朝早出席行政會議前，繼續被傳媒追問有關事件，又質疑佢點解只向《蘋果》發律師信，但無向連日來以頭版報道佢做「亂港四人幫」嘅《成報》採取類似行動？
CY回應指，「這些事情當然要看它的影響，影響重大需要澄清」。難道佢認為自己被指係「亂港四人幫」並無重大影響？記者之後再次追問佢為何唔向《成報》發律師信，佢就未有再正面回應。
對於向《蘋果》發律師信被指損害新聞自由，CY強調新聞自由與新聞界有責任全面報道事實並無牴觸，又澄清今次發信並不涉及公帑。佢重申，最先報道UGL事件嘅澳洲傳媒，於見報一周後已澄清及撤回有關報道，「人家已經兩年前主動澄清了，大家可以看看澳洲傳媒怎樣處理這些事情」。