政情：游BB無悔 立會照講扑嘢

撰文解釋為爭取未來出路

理大學生會前晚喺校園舉行論壇，討論收回單程證審批權等問題，獲邀講者全部係泛民同本土派議員，結論當然係一致支持收回審批權，到咗論壇尾聲，游BB突然「爆seed」，話港人一畢業就要向政府還錢，又供唔起樓，最慘係「就算我哋要扑嘢，我哋都搵唔到房去扑，呢個係一個好現實嘅問題！」

游BB呢番言論於網上瘋傳，佢事隔數小時後喺fb以「理工大學論壇後記」為題撰文，繼續就「扑嘢論」加上註腳，佢狠批政府利用完年輕人嘅勞動力後，將之棄如敝屣，直言喺市場飽和，各行各業難覓容身之所，及喺負債情況下，「年輕人就連扑野（嘢）的場所都買少見少，連扑野（嘢）都要排隊」，佢重申爭取嘅並唔係一個扑嘢空間，而係未來嘅出路，又話要正視主權問題，重新選擇一個真正為自己開天闢地嘅民主政府。

稱言論由來並非個人經驗

而喺尋日較後時間，本身中文系畢業嘅游BB再解釋「扑嘢論」由來，直言自己只係引述其他人說法，並非個人經驗，但強調無悔以「扑嘢論」反映土地、房屋問題，事關以上問題真實存在，毋須忌諱。當問及日後喺議會發言時會唔會再爆seed有類似比喻，游BB未有說不，表明有需要唔排除會咁做。

話時話，游BB今次事先張揚喺議會內或有爆seed言論，網民對此反應兩極化，支持者覺得佢好敢言，反對者就覺得佢身為議員，應要謹言慎行，下周三新當選嘅立法會主席似乎無可避免遲早要處理類似情況，甚或被建制派議員要求裁決有冇違反《議事規則》，唔知由立法會秘書長陳維安領導嘅秘書處，會唔會做定資料搜集，畀新任主席參考吓呢？

除此以外，游BB尋日自爆喺一、兩個星期之前，曾經喺某日收到兩名網友，向其fb專頁發出不雅照片，當中涉及男人性器官特寫，好彩佢嘅助手好快已經將呢啲不雅相片刪走咗，否則就真係嚇死游BB喇。