中環出更：日走十公里 曹貴子撐慈善跑
繼舊年首次舉辦慈善跑獲近千名跑手響應之後，保良局喺十二月初將於元朗大棠再舉行「保良局慈善跑」，尋日一眾董事局成員同支持機構代表齊齊出席宣傳騷。卓妮見身兼今次活動籌委會主席嘅保良局總理曹貴子面色紅潤，好似啱啱跑完步咁，但佢笑稱其實係啱啱去咗拜山，曬親啫！不過佢的確好鍾意跑步，每朝由位於香港科學園附近嘅屋企跑到小瀝源公司返工，大約用咗一小時，路程長達十公里添！
但係日日跑硬地，膝頭自然吃不消。曹貴子笑笑口話，所以佢就喺屋企嘅三千呎天台自製軟地，鋪咗打高爾夫球用嘅草皮，一來可以跑步，二來可以練習打高爾夫球，一舉兩得。
郭少明學Pilates健身
同場仲有保良局主席郭羅桂珍同老公莎莎國際主席郭少明（Simon），Simon身形一向都好fit，唔知平時有冇跑步健身呢？Simon笑稱冇跑步習慣，所以今次只係精神支持吓保良局。咁平時做咩運動多？佢話有上堂學Pilates、拉吓筋，但一星期只上堂一次，笑稱唔跟住教練，自己就會偷懶喎！
跑手堂體育會總教練紀嘉文同康宏環球主席王利民等人都有到場。紀嘉文係香港半馬拉松紀錄保持者，已跑咗十八年馬拉松，見證馬拉松賽事喺香港變成一場嘉年華。佢話好多人仍欠缺正確嘅跑步知識，例如未經練習或唔熟悉路況，亦有人着住行街鞋落場，其實好容易受傷o架！
卓妮