成日話「長江後浪推前浪，一代新人勝舊人。」依家已經過時喇，事關部分年輕人觀念愈來愈開放，作風愈來愈大膽，一代新淫勝舊淫就差唔多！
冇錯嘞，功夫茶講緊嘅咪係大學迎新營活動囉。日前有自資院校新生懷疑參加迎新營期間，喺渡輪上大玩意淫遊戲，兩個男生舔女同學大腿，全程嘻嘻哈哈，旁若無人，不知幾enjoy，唔知嘅仲以為拍緊A片。話口未完，尋日另一院校又有新猷，一名女生跪喺兩男中間，雙手分別放在兩男褲襠，而且緊握拳頭似有所動作添。
即係咁，近年O camp鹹鹹濕濕，大家早就見怪不怪，但點激都好，都叫做匿埋校園自己玩餐飽，家陣衝出校園，實行「獨樂樂不如眾樂樂」，你話係咪新淫勝舊淫嘞。
今時唔同往日，再講「非禮勿言，非禮勿動」，同對牛彈琴冇乜分別，況且大學生已經係成年人，閂埋房門做愛做嘅事情，其他人冇說話好講，之但係大庭廣眾之下就唔同講法喇。正如法律界人士話齋，渡輪意淫「遊戲」已經超出一般人道德底線，較接近涉及普通法中嘅有違公德罪，嚴重嘅分分鐘監都有得坐，絕對唔講得笑。依家好喇，唔單止自己成為新聞焦點，仲搞到同校同學畀人指指點點，你話係咪累街坊吖！
有網民形容依家啲迎新活動愈玩愈變態，愈玩愈亂龍，建議Orientation Camp改名Orgy Camp（狂歡營），可謂一針見血。新鮮人喺呢種「校園文化」薰陶下，價值觀唔扭曲至奇。就尋日之嘛，有大學生因為觸摸師妹大腿內側，非禮罪成被判感化；至於上演「渡輪春宮」嗰間院校，年前亦有學生街頭野戰嘅片段曝光，結果同樣惹來官非。
點解年輕人搞成咁？「爛果報」一類不良傳媒長期宣淫販賤，荼毒青少年，固然要負好大責任，整體教育制度失敗，更值得大家反思。教不嚴，師之惰，教師不務正業，專門挑動學生搞政治，為害路人皆見，有啲教育工作者一味鄉愿，唔敢指正年輕人錯誤，表面係「包容」，其實更加誤人子弟。唔係咩？O camp亂象不絕如縷，幾時見過校長教授嚴辭譴責？政治入侵校園，港獨思潮氾濫，幾時有人講過公道話？就係因為咁，部分年輕人以為自己真理在手，就可以目空一切，想點就點，結果咪搞到校園烏煙瘴氣囉！
古人話︰少年智則國智，少年強則國強，少年進步則國進步，眼見現實同理想漸行漸遠，你話香港仲點會有運行吖！