自由黨下月將開會選出新一屆領導層，現任主席鍾國斌（Felix）如無意外將出任黨魁，至於騰出嘅主席職位，原定接棒嘅邵家輝以初入立法會需時處理議會工作為由拒絕，導致出現後繼無人嘅窘境，政圈流傳Felix有機會同時兼任黨魁及主席。該黨原先只有主席一職，至一三年先增設黨魁，莫非三年貨仔就要走回頭路，將黨魁同主席重新合併？
該黨喺一三年修改黨章增設黨魁一職，將原先作為領導層最高負責人嘅主席職能分割，黨魁成為最高領導，負責所有議會事務及黨團整體發展；而主席就集中黨務，主力做地區工作同培訓接班人。現時黨魁由批發及零售界議員方剛擔任，但由於方剛即將卸任議員兼交棒予黨友邵家輝，故黨魁盛傳將由現任主席Felix出任，現任副主席邵家輝坐正為主席。
不過，邵家輝以需時處理議會工作為由，拒絕未來四年立法會任期內擔任主席。政圈傳出該黨搵唔到接任主席嘅合適人選，只能夠作出兩個選擇，一係令到主席之位首次出現懸空，或者由Felix兼任黨魁同主席。估唔到該黨依家已經人才凋零到連搵人接任主席都咁難，如果Felix真係兼任黨魁同主席，實際行番以往只有主席嘅舊路。