政情：遊北海道充電 蔣麗芸親親大自然
好多議員都趁下月新一屆立法會開鑼前出外充電，好似「九西票后」蔣麗芸（Ann）都唔例外，孖住老公梁海明去北海道自駕遊，八日行咗近一千九百公里，佢仲教路，千祈唔好揀冬天去北海道自駕遊，事關落雪揸車好危險喎。阿Ann仲喺社交網站自爆同老公就旅行地點有分歧，阿Ann提出去歐洲睇畫，老公就話去澳門同廣州打波，但最後都達成共識，中間落墨去北海道睇大自然。
北海道八日自駕遊，阿Ann行咗一千八百八十公里，幾乎行勻整個北海道咁滯。覺得好玩梗係公諸同好，佢拋出路線圖，第一站札幌參觀市內名勝同去小樽食海膽飯，跟住去阿寒湖浸溫泉、睇湖景，森林漫步兼南下釧路市看海，之後去稚內睇伊奴族文化、旭川上山睇雲同動物園、富良野食燒烤睇田野，最後一日去完千歲睇鮭魚回流產卵後，就去機場Outlet購物，然後就返港嘞！