政情：方平遠赴澳洲為細女執屋
養兒一百歲，長憂九十九，葵青區議會前主席方平都唔例外，早前佢出席一個公開活動，透露下月會去澳洲探望喺當地讀緊書嘅細女。被問到會唔會叫細女陪佢喺澳洲周圍玩吓，方平就頭擰擰，話過去做家務就有份喎。
方平個細女依家喺澳洲讀高中，佢就喺澳洲買咗間有花園嘅屋畀細女讀書。雖然方太都有去澳洲「陪讀」照顧細女，但屋企啲粗重家頭細務，例如清理花園等，多數都係等佢去澳洲先搞掂，所以佢去澳洲唔係去旅行，而係做「阿四」。不過，方平似乎做「阿四」做得好開心，見佢講起愛女咁好笑容就知喇。
方平又話，細女遲啲應該都會留喺澳洲升讀大學，到時佢太太就未必會再「陪讀」，會返港居住，到時就唔知邊個幫佢愛女執屋喇。