政情：立會搵錢嘥 「主席」等人踩

立法會喺地下大堂新增咗模擬主席座位同議員座位，目的係畀參觀立法會人士可以多一個「景點」影相留念。呢個意念係由秘書處構思及設計，雖然秘書處中人都讚兩個布景板好似電影劇照咁具真實感，但講到尾，實際用途欠奉。再者，立法會同立法會座位係個好莊嚴嘅地方，模擬主席座位更有象徵意義，如果有激進本土派人士玩嘢，向模擬主席座位掟雞蛋、塗鴉、或做不文手勢，甚至坐喺主席位飲食，見咗報真係乜嘢形象都冇晒。

投票系統轉用板腦

此外，秘書處亦因應現有投票系統已經沿用五年，開始出現失靈情況，議員撳唔到掣嘅情況亦時有發生，所以秘書處研發咗一套新電子投票系統，議員可透過固定輕觸式平板電腦使用新系統投票。平板電腦除咗設有白色「在席」、綠色「贊成」、紅色「反對」、黃色「棄權」圖標外，亦會喺會議期間顯示正在討論嘅議案、議員發言時間、議案審議階段等內容。而舊有系統就繼續提供即時傳譯及服務鐘功能。

傳呼機絕迹新會期

過往立法會拉布時，部分議員會用硬卡紙、標語等遮蓋投票系統上嘅「贊成」或「反對」按鈕，以防喺大批修正案投票時投錯票，將來議員要用平板電腦投票，可能要喺平板電腦上貼貼紙先得喇！不過，過去議員投錯票都係自己甩轆，同舊系統或者新系統無關，所以相信投錯票會繼續發生。此外，秘書處喺新一屆立法會開始，唔會再向議員派發傳呼機，並改以手機SMS短訊發訊息予議員，正式告別傳呼機時代。