中環出更:「茹素」家珍 身體健康脾氣好

近年全球興起綠色飲食,仁濟醫院亦趕上潮流,去年發起全港素食文化推廣活動,向社會大眾宣揚綠色飲食概念,日前仲搞咗場素食廚藝烹飪比賽,作為活動壓軸項目。身為素食者嘅仁濟醫院副主席黃美斯(Macy),總結今次活動成績唔錯,好似仁濟醫院旗下嘅復康中心已實行「綠色星期一」計劃,事關好多智障院友鍾意大魚大肉,要佢哋養成素食習慣真係唔容易。

Macy話,當班院友接受素食後,無論體重及各項生理指標都大有改善,明顯較以往健康。至於董事局內,佢就邀得總理曾麗詩加入素食行列;而仁濟醫院所舉行嘅飯局,亦盡量加入素食選擇,總之全方位推行素食。剛剛加入仁濟醫院擔任行政總裁嘅梁偉光話,雖然佢未能茹素,但為免就寢前加劇腸胃負荷,晚飯通常都係多菜少肉。

卓妮同場仲見到社會福利署荃灣及葵青區福利專員黃國進,佢好支持素食主義,仲憶述中學時代曾經飼養白老鼠,發現靠植物餵飼嘅白老鼠,性情溫馴氣色良好,但以肉類為飼料嘅白老鼠,就恰恰相反,對照喺人類社會,茹素者脾氣又的確比較好。佢又話,礙於交際酬酢,好難三餐都茹素,惟有早午兩餐維持素食。

朱德榮食肉至夠氣力

今次為烹飪比賽擔任評審嘅仲有仁濟醫院副主席葉恭正(Paul)、總理孫蔡吐媚同朱德榮。孫蔡吐媚自九年前開始,實行初一、十五茹素習慣,結果體重有所下降,容貌睇嚟亦年輕咗。不過,減緊磅嘅Paul,就話曾經嘗試素食幾日發覺周身乏力,最終都係不可食無肉。朱德榮亦係唔習慣素食,總係覺得男士要食肉至夠氣力。要綠色飲食進一步普及,睇嚟Macy仲要加把勁。

卓妮

第一手消息請下載on.cc東網iPhone/iPad/Android/Windows Phone Apps