政情：工展會邀美食車 部門輪流派檸檬
中華廠商聯合會（廠商會）每年年底都會喺銅鑼灣維園搞工展會，副會長兼展覽服務公司主席戴澤良（Tony）原本想搞搞新意思，邀請同樣喺年底新登場嘅十六架美食車輪流進駐工展會，既可谷旺場地人流，美食車又有生意，市民則有更多選擇。點知Tony分別向負責美食車計劃嘅旅遊事務署同商務及經濟發展局（商經局）商討建議，卻慘食「檸檬」。
話說美車食申請結果一出爐，Tony即刻向有關部門提議畀美食車進駐維園工展會，佢認為美食車指定進駐嘅地方只為方便遊客，但喺工展會登場可以畀機會市民一嘗美食車嘅獨特美食。不過，Tony先後同旅遊事務署及商經局商討，點知兩個部門互相卸責，又話美食車嘅合約條款列明只能喺指定地方營運，Tony批評當局作風官僚同死板，但佢話會繼續爭取喎。